“ჭიაკოკონობის ღამეს” ნარჩენების დაწვაზე კონტროლი მკაცრდება

გარემოსდაცვითი ზედამხედველობის დეპარტამენტი მოსახლეობას აფრთხილებს, რომ ნებისმიერი ტიპის ნარჩენის, მათ შორის, საბურავების, პლასტიკის მასალის ღია წესით დაწვა აკრძალულია.

ნარჩენების ღია წესით დაწვა ჯარიმდება 500 ლარით, ხოლო საბურავის, რეზინის დაწვა 1 500 ლარით.

აღნიშნული ნარჩენების დაწვისას, გამოიყოფა გარემოსა და ადამიანთა ჯანმრთელობისათვის საშიში ტოქსიკური, კანცეროგენული ნივთიერებები და აირები. საფრთხე ექმნება მოსახლეობის, განსაკუთრებით კი, ბავშვების ჯანმრთელობას, რომლებიც აქტიურად მონაწილეობენ ტრადიციულ რიტუალში.

უწყების ცნობით, გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლები, „ჭიაკოკონობის ღამეს“ კონტროლს გაამკაცრებენ და თითოეულ სამართალდარღვევაზე შესაბამის რეაგირებას მოახდენენ.